31فروردين1358 سولدوز فاجيعه سي هفته سي و شهيد دوشنلرين پاك روحلارينا ايتحاف:
بيرگروپ كورد تروريست
انقلابدان سگيز دوققوز ايل قاباق ، اورمونون صائيب مدرسه سينده ادبي ريشته سينده درس اوخوردوم، بعضي مالي محدوديت لر اوزره مجبور اولدوم درسي ياريمچيليق بيراخيب و هاوا قووتلري (نيروي هوايي) همافرليقي (چاووش لوق ليسه سي) نه يازيلام . هر حالدا سيناوي باشاريلا گچديكدن سونرا مني نيظاما قبول اديب و تهراندا فني رسته سينده تعليماتا باشلاديم . اورانين موحيطي و خصوصاً اينگيليزجه درسلرين اولماسي و تعليماتين يوكسك سويه ده اولماسي منده يامان ذوق و شوق اويانديريب و چوخ ماراق و باشاريلا صينيف ده اوستون بير اويرنجي اولاراق درس اوخوردوم . ايلك ايليميزي تزه قوتارميشديق كي بير گون مني اوخول ايداره سينه چاغيريب و قيستا بير موقديمه دن سونرا منيم دوام اتممه مه يا ساق گلمه سين بيلديريب و مني آموزشكده گروهباني نيروي هواييدن ايخراج اتديلر. اليم قالميشدي آغزيمدا ؛ كي نه اولدي ؟ آخي من نينميشم ؟ قوصورروم نه ايميش ؟ چوخ چكيش بركيشدن سونرا معلوم اولدوكي آتامين بير خالاسي اوغلو گويا 21آذر حركاتيندا دمكرات فيرقه سينديميش و او زامان سووت ايتيفاقينا مجبوري قاچانلاردان بيريسي ده او ايميش و ارتشين روكن 2(اوردو نون جاسوسي و ضد جاسوسي بولومي) بو مسئله ني فرق اديب و منيم اردو دا اولماغيمي اويقون گورمويوبدور ، معلوم اولدو بو اوزدن اوردودان آيريلماقيمي امر اديبلر. هر حالدا اوزگون و يارالي اورمويا قييديب گلديم . بير ايكي ايل اويوز بويوز دا هوتلدن توتوب ماشين ميكانيكي يانيندان توتون عكاسخانايا كيمين هاردا مومكون اولدي چاليشديم . سونرا گوردومكي احوازدا بير دولتي دايره ده ايستيخدام وار گديب اوردا ايستيخدام اولدوم و ايران عراق ساواشي باشلانانا كيمين اوردايديم . ساواش باشلاناندان سونرا اورمويا اينتيقاليمي آلديم و امكلي اولانا كيمين اورمودا يديم . الغرض اوچ بش ايل احوازدا ايشليندن سونرا بير ژيان و داها سونرا بير 51 پيكان آليب و 58نجي ايلينين بايرام تعطيلاتيندا خانيمي گتيريب اورمويا قويوب و اوزوم احوازا گري دوندوم . سيزده دن خيله سونرا گليب و خانيمي گوتوروب احوازا دونه جييديم . تقويم 30فروردين 1358-ئي گوستريردي و بيز صاباح يولا چيخاجايديق ، ايكي نفر قديم هم محله لردن گوتوروب بيرليك ده ، دديك بير بنده گديب بير آز دولانيب و ناها را ائوه قاييداق كي صاباح يولا چيخاجاييق . ديه گوله گديك و بندين دمير كورپوسون گچيب گچمه ميش بيردن آغاجلار داليندان 4-5 سيلاحلي كورد قاباغيميزا چيخديلار . مجبورن ماشيني ساخلاييب و اشاغي دوشدوك . بولاردا ماشينين آرخا صانديقين آچيب بويو ك بير شير فلكه ارخدن چيخارديب ماشينين دالينا قويدولار.(سورا بيلديك كي اورمونون آنا سويونون بوروسون باغلييبلاركي حتي آز زاماندا اولموش اولسا بير تهر خالقي زحمته سالسينلار). دوسلاريمين بيري بولارين سركرده سين تانييب ددي كي ايسكو خان خير اولا نينيرسينيز! آخي سن مني تانيسان ، بو نه ايشدي؟ ايسكو(اسكندر)چونوب و گوله گوله ددي : آدام اله دوستونون ماشينين امانت آلاردا ! سيز بوردااوتورون بيزيم بير ايشيميز وار گدك ، گلك . ماشينيزي ورريك !!! باشيزي ديشيزي آغيرتماييم سيلاح گوجونه ماشينيا دولوب گتديلر. من شهره دونودوم و دوسلاريم بو اوميد نن كي بلكه ماشيني قيته ررلر اوردا قالديلار. گديب شهرده باجيمين ارين و آتامي تاپيب بير ليكده بير ژياننان كي داماديميزينكيدي ينه بنده قاييدديق و دوسلاريميزي اله همن يرده گوردوك . باجيم اري ددي كي فيلان كس گل سنن من بير آز اوسته كيمين گدك، بلكه ايشاللاه اوستلرده بير يرده ماشيني بيراخيب گديبلر ، گوررسن كي حلال مالدي گري قيتره بيلد يك ! هرحالدا بير اومودنان يولا دوشدوك . يولدا هر يرده چوبان ، اكينجي و عادي كوردلري گوردوك كي اوز ايشلرينه مشغوليديلار ،آمما هامميسي سيلاحلي !!! ياواش ياواش جانيميزي خوف باسميشدي . جاوانليقدا بله بير ايناد اينساندا وار كي راحات راحات واز گچنميسن . بير آزدا گتديك ، سه راهي راژانا چاتديقيميزدا گوردوك كي يول تما من باغلانيب و بير تابلودا ايري بويرو خطله يازيبلار قيعاده موقت كرد ! (ياعني دولت موقت كرد)هر طرفيميز سيلاحلي كوردن قاينييردي. اوردا بيردن كوره ييميزه ايستي چيخدي كي اي دل غافيل ! اولان بيز اوز اياقيميزنان آري يوواسينا گيرميشيق!!! بيزي ينه ماشيندان انديريب هر يريميزي و ماشيني آختاراندان سونرا سوروشدولار: سيز كيمسيز و بوردا نه ايشينيز وار ؟ گوردوم كي بيز بولارا سوزون دوزون دسك قورتولاجاقيميز اولمياجاق ، او اوزدن بير يالان اويدوردوم و دديم كي واللاه من سولوك لي ايسكو خانين دوستويام . ماشيني مندن امانت آلميشدي و گويا بير ماموريته گداجاغيدي ! ايندي بتر نيگرانام ! چوخدان گديب آمما گلمييب . اونون ساغليقين مراك اديب خبر آلماقا گلميشيك!!! اورداكيلار تل سيز (بي سيم) له قوماندان لاريلا دانيشيب و بيزي قرارگاه لارينا كي بير تپه نين اوستونديدي آپارديلار ، آمما بير آز يوموشانميشديلاركي گويا بولاردا بيزدنديلر. آخي اوزامانلار بعضي بيزدن سولچولار كورد چته لرينن يارديم و ياتاقليقلاريلا مشغولويدولار و بيزي اولاردان سانميشديلار. اوردا قوماندان اونجه مندن سوروشدو: اولان شهرده نه خبردي؟ بيزده دديك كي واللاه نه اولاجاق ساغليقينيز! ددي : آخي دييرلر شهرده عجملر كوردلرين آروادلارينين امجه يين كسيبلر و مركز ده آغاجدان آسيبلار!!! اوندا گوردوك واي ددم واي نه تحريكاتلار و نه يالانلار اويدوروب و كوردلري نجه توركلرين عليهينه قيشقيرديبلار. در حال بو سوزلري يالانلييب و آند و قسم ايچديك كي واللاه بيللاه ! بله بير شي يوخدو . بيز اوزوموز كومونيستيك !!! بله بير شي گورسيديك سيزه يالان دمزديك. واللاهي بله بير شي اولمويوب . اوزون سوزون قيستاسي پيس كوكده بيز كومونيستيق يالانيننان بيزي بيراخديلار و سوز ورديلر كي ايسكوخان گلديينده بيزي بي خبر بيراخماسين ، تو دابانا ژيانا اولمازين موصيبتي وريب بنده كيمين آرخاميزا باخمياراق مين دفعه قوربان دديك كي ساح سلامت يتيشيديك !!! ، گازلييب گلديك بنده چيخديق. اوردا گوردوك كي هم دوستلاريميز و اونلاردان زياده آتام رحمتليك نيگرانچيليقدان ياري جان اولوبلار. كور پشمان قييديب شهره گتديك . اول شهربانيا گتديك ، حال قضيه ني تعريف ادنن سونرا بيزه جاوابلاري بو اولدوكي ياخشيسي بودو ژاندارمريه گدين ، چون بيز شهردن اشيه باخانماريق . اوردان ژاندارمريه گتديك . اولاردا دديلر : ايندي قديم دييل ! دا بو ايشلره سيپاه باخير . مجبورنً قديم ساواك ساختيمانينا كي تزه سيپاه قرارگاهي اولموشدو گديب حال قضيه ني دديك . اولاردا آغزيميزي داشليقا ورديلر و كور پشمان ماشينسيز آرواديدا قولتوغوما ووروب اوتوبوسنان احوازا گتمك ايستديم . بو اثنادا خبر گلدي كي يول باغليدي و كوردلر سولدوز ماحالين باسيبلار! يول باغلانيب و بيزيم عادي طريقدن احوازا گتمه ميز مومكون دييل . اوردا من تزه بيلديم كي كوردلر ندن اوجور سيلاحلي توپلانميشديلار و او كورد آروادلارينين باشينا گلن اويدورما يالانلار ندن پراكنده اولونموشدو!هر حالدا مجبورن تهرانا گديب و اوردان يولوموزي ايكي قاتا چيخاراراق احوازا ايش يريمه دوندوك.
آمما سيزه دييم ماشيندان . بير ايكي هفته سونرا آغام بير كورد خياط كي دره چاييندا بيزينن محله قونشوسويدو، تاپيب و حال قضيه ني ديير اودا ديير كي سولوك لي ايسكو خانين اوزوندن اوميد يوخدو آمما آروادي مرد بير خاتيندي ! دو گدك آروادين واسيطه سالاق بلكه ماشيني آلديق ! آغامدا دورور بو كوردي گوتوروب و سولوكا گديرلر. بخت اله گتيرير كي ايسكو خان ائوده اولمور ؛ بولار ائوه قوناق عينوانيندا گديب و ايسكو نون خانيمينا قضيه ني دييب و يارديمين ايستير لر . اودا بير شي دمير و سكو نين گلمه سين بكله مه له لرين سويلويور. آمما ديير كي قويون گورك نينيه بيلريك . آندان گجدن سكو اله منيم ماشينيمنان گلير . ائوده قوناق اولدوقون اويرنير ، آمما نيه گلدييك لرين بيلديينده چيله دن چيخير . آتام بله نقل الير كي ال آتي توفنگه و لوله يه بير گولله يريتدي! گوزلري تپه سينه چيخميشدي. دديم ايسكو خان بير آز ياواش اول ! كورتچه دوستوما دديكي اولان بيز سولدوز دا نه آداملار ايتيرميشيك !!! سيز گليب سيز منيم غنيمتيمي آپاراسيز؟! بو زامان آروادي آرايا گرير و كوردجه غضبنن ارينه ديير : ايسكو نه خبريندي ! قوناغا توفنك چكيسن !هر حالدا ايسكونو ياتيشديريللار.ايسكودا ، قوناقلاردا ، يرلرينه اوتورورلار. آتام بله ايدامه ورير كي ال آتديم جيبيمه ماشينين سندين ، كارتين و بير يدك سويچين چيخارديب وسكونين قاباغين آتديم و دديم كي : ايسكو خان من دديم به سن كيشيسن ! توپوردوغويون يالامياجاقسان ! آخي مرد مومين سن منيم اوغلوما سوز ورميشدين ماشيني گري گتيرجكسن !ايندي من اونا نه جاواب گوندريم؟! آغا ، ديير بو سوز يامان سكونو آروادين قاباغيندا كوچوك دوشوردو . (بوردا آتام رحمتليك بير پسيكولوژريك – روانشناسانه – حربه دن ايستيفاده اديب و ايسونون كورد دامارينا باسير). ايسكو ماشيني گري ورمه يه راضي اولور و ماشيني گوتوروب اورمويا گتيريللر . من گليب ماشيني گوردويومده متوجه اولدومكي اله بو ماشيننان بونلار سولدوزا گتميشيميشلر . چون ماشينين قاباقليغي هچ اولموشدو و گيلگير ، قاباغ و يان شوشه لر و اوتاقين نچه يرينده گوله ايزي و دوشكلرده بير نچه يرده قان آثاري ، بولان سالان گورونوردو.
حسني اورمونون موجاهيد امام جومعه سي
بو حيكايه تمامن حقيقتدير و منيم بير دوستومون باشينا گلديين نقل ادير . مكانلار ، زامان و اينسانلار تمامن گرچكديلر. بو خاطيره ني 31فروردين سولدوز ساواشينين آنينا يازميشام .
هیچ نظری موجود نیست:
ارسال یک نظر