قره باديمجان ، سياست و اورمو گولي

بيز اوشاقيكن كوچه ميزده توپ اوينارديك و توم اوشاقلاركيمي سس كويوموز ، خصوصاً ناهار اوستو قونشولاري راحاتسيز ادردي. آمما چون هركسين اوشاقلار جمعينده بير بالاسي واريدي كيمسه توپ اويناماميزا قارشي چيخمازدي. فقط بير ائو واريديكي هر زامان توپوموز او ائوه دوشردي توپوموزو ييرتيب اشيگه آتارديلار؛ اونلارين اوشاقلاري يوخويدو و بيزيم ديلده سونسوزايديلار. بو ائوين صاحابي دست بر قضا فرهنگي و ادبيات فارسي معلميدي و تصادفاً گويا قره باديمجاندان دا خوشو گلمزدي و قره باديمجان گورسيدي يا بيري بو كلمه ني آغزينا گتيرسيدي يامان ناراحات اولاردي. بير چوخ اوشاقلار سعي ادرديلر كي توپلاري بو ائوه دوشمسين و كوچه بازاردادا بو محترم معليمه راس گلنده ياواش دان سوزوب گدرديلر . آمما بير ايكي دنه سيرتيخ اوشاق واريدي كي اوزاقدان بو آدامي گورونجه قره باديمجان چيغيريب قاچارديلار يا ناهار اوستو، كوهنه خراب خوراب توپ لارين اوستونده قره باديمجان رسمي چكيب بو ائوين حيطينه  شوتدرديلر ، آقاي معلم ادبيات فارسي دا چيخيب هچ ادبي اولميان كلمه لر صرف اديب ، سونرا داريخيب و عصبي اوينه گري دونردي. ايندي بيزيم حيكايه ميزده بله اولوب . قره باديمجان گيلين حيطي بير بويوك حيط اولوب و ايراندا سياست حيطي آدلانيب و اطرافيندا كوچه لر دار قاليب لار ، يازيق اوشاقلار هر توپ اويناديقلاريندا، توپلاري قره باديمجان گيلين (يا سياست حيطينه دوشور) و جناب قره باديمجان چيخيب هچ فرهنگي اولميان بيچيمده اوشاقلاري پراكنده ادير. 13فروردين گونوده آزه ربايجانليلار بير غير سياسي ايستكلرين ديله گتيرمك اوچون بير ييغينجاق اعلان اتميشلر (كي گويا اورمو گولو قوروماسين) ، بير ايكي گون اونجه دن منيم كيمين سوزه باخان اوشاقلارا تلفن آچيب و اورايا گتمه ملرين ايستديلر . بيزده قولاغ آسيب ائودن اشيه چيخماديق ! آمما اون اوبش مين سيرتيق اوشاق گديب و قره باديمجان چاغيرديلار .  آقاي معلم ده چيخيب اسكي زامانلار كيمي هچ بير فرهنگيه ياراشميان بيچيمده اوشاقلاري پراكنده اله دي. ديه ن يوخدي بويوك قارداش بو اوشاقلار سنن ايشلري يوخويدو. والله بيللاه سن اشيگه چيخماسايدين هچ قره باديمجان دا دميه جكديلر! (اله قره باديمجان دا بليدي چون اوشاقي يوخويدي (سونسوزويدو) صيرف اوشاقلاري داغيتسين و اورگي سرينله سين اوشاقلاري قوواليردي يوخسا اوشاقلار اوننان ايشلري يوخويدو). سونرا ياواش ياواش اوقدير قره باديمجان اوشاقلارا دولاشدي لاپ اوشاقلارين زحله سين آپاردي ، او تاريخدن هر اشيگه چيخاندا حتي او ياواش سوزوب قاچان اوشاقلاردا ؛ قره باديمجان دييب سيرتاليرديلار ؛ اله اولموشدوكي قره باديمجان تكجه آروادينان اشيگه چيخاندا اوشاقلار بير سوز دميرديلر ! سورالار او ايكي اوش دنه سيرتيق اوشاق  ، قره باديمجان آروادينان دا اشيگه چيخاندادا قره باديمجان دييب قاچيرديلار!!! سونراسيندان خبريم اولمادي ، بيز بويودوك اول يونيورسيته يه آيري شهرده سونرادان عسگرليغه گتديك ؛ گري دوندويوموزده قره باديمجان اولموشدي و آرواديدا قونشولاردان اوتانيب حيطلرين ساتيپ آيري محله يه كوچموشدو .