ار کیشی ایله باشی قارا
او گئجه نین قارانلیقیندا ، ار کیشی ، اورماندا ساللانا-ساللانا گلیردی . بردوش لار کیمی یئرییردی. بیر آیاقی ساغا بیر آیاغی ایسه سولا آتیلیردی . هردن دوشونوب ، قاه قاه چکیب گولوردو . الینده کی ایچکینی بیر قورتدوم ایچیب گئنه یولونا دوام ائدیردی . دونیا منیم دی ، هامی سینی آرادان آپاردیم ، مندن گوجلوسو یوخدور دئیه دئیه گئدیردی .
بیر آغاجین دیبینده ، باشی قارا بؤجک ، یئرینی خوشلاییب ، یاتمیشدی . قارنی آجمیشدی . یئمک ایچین بیر یئمیش تاپمامیشدی . بیردن ار کیشی نین قاه-قاه چکیب گولمه سی ایله دانیشماسی باشی قارا بؤجکی یئریندن قووزادی . باشی قارا ، ار کیشی نی گؤرونجه قاچیب بیر اوتون دیبینده گیزلندی . ار کیشی دانیشا – دانیشا گلیردی . بوتون دونیانی ئوزونونچو بیلیردی . ئوز گئچمیشینی آنارکن گله جک منیم دیر دئییردی . باشی قارا ، اوزاقدان ار کیشی یه باخیردی . ار کیشی گلدی ، گلدی بیردن اوجادان باغیریب یئره دوشدو . باشی قارا بولارین هامی سینی اوزاقدان گؤروردو . قورخوسوندان یاخینا گئده بیلمیردی . بیراز دایانیب باخدی . ئوز-ئوزونه دئدی : بو کیم دیر ؟ نه ایچین بورایا دوشدو ؟ بو آداما نه اولوب ؟ بیردن ار کیشی باشینی قووزادی . اوره یی بولانمیش کیمی ، قایتارماق ایسته دی . بیرازدان قوسدو . بوتون یئییب – ایچدیکینی قوسدو . الینده کی ایچکینی یئره سالیب ، ئولولره اوخشایارکن اوزاندی . نفسی چیخمیردی . گئجه نین قارانلیقیندا ، اورمانین اورتاسیندا ، یئره اوزاندی . نه گؤزونده گؤرمه یه گوج نه ده ال آیاقیندا قالخیب گئتمه یه دایاق قالمامیشدیر. باشی قارا ار کیشی نی ئولموش ساندی . قوساق اییسی باشی قارانی مراقلاندیر ایردی نئشه یه کئیفه دولوردو ...
باشی قارا ، ار کیشی نین ده برمه سینی گؤرمه دی ائله اونا گؤره ده اوتون آلتیندان چیخیب ، ار کیشی یه ساری گئتدی . بیرازدا یاخیندان دوروب ار کیشی یه باخدی . او ، نفس چکیب ده برمیردی . باشی قارا ئوز-ئوزونه دوشونوردو : من آجمیشام ، بودا بؤیوک بیر تیکه دیر . من تکجه یئیه بیلمره م . گئدیم اویاندا یاشایان باشی آق یولداشیمادا دئییم اودا گلسین بیرلیکده یئیه ک هم دئیه رم بونو من ئولدورموشم هم اونلارین باشچی سی اولارام همده چوخ چاغلار آجلیقدان . اوندا هامی منی گوجلو بیر باشی قارا بؤجک تانییاجاق هر نه ایسته سم ائده جم .
یولا دوشوب گئدیر باشی آق یولداشینی تاپیر . اودا بیر اوتون آلتیندا اوزانیب یاتمیشدی . باشی قارا اونو گؤره رکن باغیردی : هئی ، باشی آق یولداش ، منی دینله ییرسن ؟ باشی آق بیر گؤزونو آچیب آلتدان – آلتدان باشی قارایا باخیب دئدی : نه ایسته ییرسن ؟ من بیر یئمک تاپسام ئونجه ئوزوم یئیه رم لات دا نه وار لوته ده نه وئرسین . باشی قارا باغیریب دئدی : منه باخ ، من سندن بیر یئمک آلماق ایچین گلمه میشم من ئوزوم بوگون بیر ار کیشی نی ئولدورموشم بوندان بئله اونو یئیه جم هئچ یوز ایلده یئسن قورتارماز . آما من ایسته مه دیم تک یئیه م سنی ده چاغیرماقا گلمیشم . باشی آق گولوب دئدی : سن ؟ نه جور بیر ار کیشی نی ئولدوره بیلدین ؟ من سنی تانیرام سنده او چیخار یوخدور . باشی قارا بیراز هن-هون ائله ییب دئدی : باخ ، سن دوز دئییرسن من ئولدورمه دیم آما بیز ایکیمیز ائله یه بیله ریک بو بؤلگه نین بوتون بؤجک لرینی قاندیریب اونلارا هر نه جور ایسته سک داوراناق . بؤجکلر کیرالی اولاق .باشی آق بیراز دوشونوب دئدی : گؤزه ل سؤز دئییرسن. باشی قارا تئز دئدی : اوندا سن او بیری لری چاغیر گلسین آما اونلارا دئیه رسن من بو آدامی ئولدورموشم دئیه ر سن کی من تانری گؤنده رمیش بؤجکم .
باشی آق دوروب یولا دوشوب گئتدی . باشی قارا گئنه ار کیشی نین یانینا قاییتدی . آی ایشیقی ار کیشی نین اوزونه دوشوردو . آغاجلارین کرلگه سی ده بیر یاندان دوشوردو . باشی قارا قورخا-قورخا ار کیشی نین اوزونه چیخیب بیر دیش ووردو . ار کیشی ده برمه دی . گئنه بیر دیش ووردو . گئنه بیر سس چیخمادی . اوتوروب دولو قارین یئدی . بیردن باشی آقین سسی گلدی . اونون دالیسیجا یوزلرجه باشی آق بؤجک گلیردی . هامی سی ار کیشی نین یانینا چاتارکن ، باشی قارا آغزینی سیلیب باغیریب دئدی : دورون . هامی سی دوردو . باشی آق ، ار کیشی نین اوزونه چیخیب ، باشی قارانین یانینا گئدیب دئدی : هامی سینا دئمیشم بو آدامی سن ئولدوروبسن هامی سندن قورخور . هر نه سن دئسن اونا باخاجاقلار سنی تانری گؤنده رن بیر باشی قارا بؤجک بیلیرلر. باشی قارا گولوب دئدی : گره ک ده اوجور اولسون ، ایندی قولاق وئر گؤر من نه دئیه جم .
باشی قارا بیراز یاخینا گئدیب باغیردی : سوسون . بؤجک لرین هامی سی سوسدو . باشی قارا اویان – بویانا باخیب دئدی : بو گوندن بری منیم سؤزومدن چیخان اولورسا ئولدوروله جک . من تانری نین یوللادیقی یام منه قارشی گه لن تانری یا قارشی گلمیش ساییلیب ئوله جک دیر . بو آدامی من ئولدورموشم اونا گؤره ده بو آدامین باشینی من ایله باشی آق یولداشیم یئیه جه ییک کیمسه نین یوخاری گلمه یه حاققی یوخدور. هر کیم سؤزومه باخمازسا ئوله جکدیر. من تانری نین ئوزو یم . من تانری یام . بو آدامی من ئولدورموشم سیزی ئولدورمک منیم ایچین چه تین ایش ده ییل.ایندی ایسه آیاقدان یئمه یه باشلایین آما دئدیکلریمی اونوتمایین .
باشی آقلار ، باشی قارانی آلقیشلاماقا باشلادیلار سونرا ار کیشی یه داراشیب یئمه یه باشلادیلار . ایکی یولداش دا ار کیشی نین اوزونو یئمه یه چالیشیردیلار . باشی قارا ، ار کیشی نین قولاقیندان گیریب ، ار کیشینین بئینینی یئمک ایسته دی . بیرازدان قاییدیب باشی آقا دئدی : هامی یا دئیه رسن یئره یئنیب آدامی ساغ یان اوسته چئویرسینلر . باشی آق دا باغیریب هامی یا دئدی . بوتون بؤجکلر یئره یئندیلر . هامی بیردن باشی قارانین سؤزو ایله ار کیشی نی ساغ یان اوسته چئویریب یئنی دن اوستونه چیخیب یئمه یه باشلادیلار .
ار کیشی گوجونون ، گئچمیشی نین نه اولدوقونو دوشونوب الینده ایچکی ئولولر کیمی یاتمیشدی . باشی قارا بئینینی یئمه یه باشلادی . بیرازدان گئنه دئدی هامی یئره یئنیب ار کیشی نی سول یان اوسته چئویرسین لر . گئنه هامی یئره دوشدولر . بؤجک لرین بیری آجیقلانیب یولداشینا دئدی : من داها یورولدوم بو آدامی ساغا سولا چئویرمکدن. نه دن باشی قارا یئنیب بیزه یاردیم ائتمیر نییه او گره ک بئینینی یئیه بیز یئیه بیلمه یک . یولداشی تئز قاچیب بو سؤزلری باشی قارایا دئدی . باشی قارادا او بؤجکی چاغیریب هامی بؤجکلرین گؤزونون ئونونده ئولدوردو . باشی آقلار گئنه باشی قارانی آلقیشلاماقا باشلادیلار . اودا بو آلقیشلاری ائشیدرکن کئیف ائله ییردی . ئوزونو یئرین تانری سی بیلیردی . ئوزوده بونا گئتدیکجه اینانیردی .
ار کیشی هله ده یاتمیشدی . گاهدان بؤجکلرین سانجماسینی حیسس ائدیردی آما اونلاری تانری یوللادیقی سانیردی . منیم بو دردیم بیتسین دئیه تانری یوللامیش قوربان اولوم سیزلره هر نه ائتسز ائدین حاققیم دیر . سیزی تانری گرنده ریب قورتارین منی بو درتدن ئولوره م . ار کیشی بو دوشونجه لرله یاتمیشدی آیاقا دورماقا داها گوجوه یوخ ایدی .
یاواش – یاواش گون چیخیردی . باشی قارا ایشیقدان قورخوردو . گونون دوغماسینی هئچ سئومزدی اونا گؤره تئز-تئز یئمه یه باشلادی . گون جیخیردی . ار کیشی نین گؤزونه گون ده یدی گونون ایستی سی ار کیشی نین بئینینی قیزدیریردی . یاواش – یاواش ده برمه یه باشلادی. باشی آقلار چوخدان قویوب قاچمیشدیلار . باشی قارادان سونرا کیمسه قالمامیشدی اودا هله دویمامیشدی گئنه ده یئمک ایسته ییردی . باغیریبباشی آقلاری دالدان چاغیردی آما هامی سی آجلیقدان چیخمیشدیلار داها کیمسه باشی قارانی سایمیردی . گون چیخدیقجا ار کیشی نین باشیندان بردوشلوق اوچوردو . ایندی ایسه گون بوتون لوکله چیخمیشدی . ار کیشی بوتون گوجونو توپلاییب دوروب اوتوردو . باشی هله دؤنوردو. اوزونده کی بؤجکی توتوب یئره آتیب اوستوندن بیر یوموروق ووردو بؤجک یئره باتدی . هر یانی نی بؤجک لر یئمیشدی . هر یئریندن قان آخیردی . آما گئنه ده آیاقا قالخماقی باشاردی . دوروب یاواش –یاواش ائوینه ائلینه دؤندو .
