حدوداً 35ايل بوندان اونجه و اوندان قاباقلار ، بيزيم اورمودا دمك اولار شهرلي لرين چوخونون كندلرده باغ ، باغچالاري واريدي . هركس اكينين يا خود باغ باغچاسين ييغيشديرماق اوچون مرداد آيينين اورتاسيندان ياواش ياواش باغلارداكي كولالارينا كوچرديلر و قفس آيي(پاييزين ايكينجي آيي) ينيدن اوز ائولرينه گري دونرديلر. مدرسه لر ده قفس آيينين 15دن اونجه رسميت تاپمازيدي. يايدا باغ لارا گتمدن اونجه هر عايله اورمونون همن ياخينليقيندا بره يا گولمانخانا پلاژلارينا گديب و ياخين اقريبالار بيرليك ده بير نچه چادير كيرالييب و يا ئوزلري قوروب هچ اولماسا بير هفته در يا ساحيلينده قالارديلار. منيم رحمتلي آتامدا بير وانت توتاردي و بيز، عميم گيل و عمه خانيميم - يزي كي اري چوخدان اولموشدو در يايا گوتورردي .گوندوزلر آغام دوچرخه ايله ايشينه گديب و آخشام گلردي . بيزده آخشاما كيمين دريا دا اوزوب گودوروشارديق. اوزامانلار اورمو اهاليسينين خانيملاري، پالتارلارينا ن سويا دوشرديلر و تهران دان يا اويوز بويوزدان گلن خانيملار مايوينان سويا دوشرديلر. بيزده سيزدن نه گيزلين اوغلان اوشاقيديك دا گديب اولارا باخارديق ! ، آمما بير گوزوموزنن آناميزي گودرديك كه بيزي ياخا لاماسين! هر حالدا گجه اولاردي و عاييله لر يا اود يا چيراغ يانديريب آخشام يمك لرين چاديرلارين قاباغيندا ييرديلر . شامدان سورا دا منيم آتام گوزل گوزل اوخوماغا باشلاردي :
تيري تانگيستان ...( بو بير روسجا ماهنيدي كي ايكينجي دونيا ساواشيندا روس سالداتلارين مارشيميش و اونلار كوچه پاجادا سيخ سيخ اوخودوقلارينا گوره او رحمتليك ازبر لميشدي .)اوندان سونرا صمد وورغون آذربايجان شارقيسين اوخوياردي .. بير طرفين بحر خزر ياشيل باش سونالار گزر... بيزيم مموش(محمد)آديندا بير خالا اوغلوموزدا واريدي(او دا هم گوزل اوخوياردي و هم گوزل رقص ائدردي ، چوخدا گوزل گارمون چالاردي ) و آتامنان اشليگ اديب بير توي فضاسي يارادارديلار. اطرافداكي همشهريلر يا قوناقلاردا گليب ييغيشيب يامان بير شنليك باشلاناردي. يامان كف الرديك، يرينيز بوش! آمما حييف گچن گونه گون چاتماز . نه منيم آتام بيرده قييديب گله بيلر و نه اونجا دونياسين دييشميش عزيزلريميز. اينسانلاردا دا او خوش داماقلار قالمييب . آمما ان اونملي بو دور كي بيزيم او گوزليم اورمو گولوموزده گدير كي دونياسين دييشسين و اولسون . والله چوخ حييف اولار بله بير ايش اولسا . اوستليك اونون اولمه سي ميليونلارجا هكتار اراضينين ده چول اولماسي دمك دير. او اولورسه آذربايجانيميز حتي توركيه و چوخلي قونشو ويلايتلر ده يامان اتگيلنه جكلر. بيز بله بير پيس و فاجيعه لي گلجگي باشيميزا گلني دوروب ، باخمامالييق . گرككي غافيل مسئوللاري آييديب و فشارلا اوز مسئوليتلرينه متوجه ادك. گلين بيرليكده 13فروردين يا سيزده گونون اورموگولون ايچيندن گدن يولدا كورپو اوستونده تيراختور آزاركش لريله بيرگه بير سو شيشه سي الريميزده و قيرميزي پارچالار لا آذربايجانيميزين يوخ اولماسين بويوك بير خير دييك . من او گون اوردا اولوب و اولكمين يوخ اولماسينا اعتيراض ادجيم ، سيزين يولو نوزودا اوردا گوزلورم . بير بوتون اولوب اورمو گولوموزو اياخدا توتاق . بير اولماساق نه اوزوموز و نه بالالاريميز بيرده اونون سولاريندا اوزه بيلميجييك. اوگون بيزه چوخ يازيق اولار!!!
هیچ نظری موجود نیست:
ارسال یک نظر