آماندي گونتاي الدن گدير! عبدالله(گونتاي) بي سدوقيه
اوقدر چوخ ايسترديم كي شاعير اولايديم مثلا فيردوسي كيمي دامدان دوواردان ، يوخدان بير شي چيخاردايديم .و يا دوهتور سروش كيمين گيزملي سيرلي قلمميم اولايدي كي قلمي اليمي آلديغيمدا قانلار آخايدي ، ير گوي اينييدي و BBCني كونتوراتا توتايديم. يا نه بيليم، گيزملي ، سيرلي ، سوزي يردن گويه باغليان بير ديليم اولايدي ؛ دوهتور عليرضا نوري زاده كيمين كي تفسير خبر دن ووروب ، دوروز اول دن چيخايديم و آمريكا سسي تلوزيونون بير پارچا اوزومه حيران اديديم. هچ اولماسا جناب شريعتمدار كيمي كيهان گونده ليگي اليمده اولايدي يره گويه يامان و افتيرا يازايديم ، هچ كيمين ده منه توخوندويو اولميايدي !
آمما نينييم ، بونلارين هچ بيري دييلم . آخي قارداشيم گونتاي دا اونلارين يانداش لارينين تايي دييل . اوز اوزومه دييرم اگر گونتايين يرينه بير اصفهانلي و يا تهرانلي و يا بير كورد سيلاحلي تروريست اولسايدي فيردوسي قبيردن خوتداييب گلردي! ، سروش دا قليمينن قان آغلاداردي! ، نوريزاده نينده هچ زاد اليندن گلمسيدي اوزدن ايراخ هچ اولماسا خوشكيت اولموشدي! آمما گونتاي بونلارين هچ بيري دييل. بس قوي آدي گچن خودي و غير خودي لر اوز ايشلرينه مشغول اولسونلار و من بو عاجيز و قاصير قلم له گونتاي قارداشيما يازيم . سيزده باغيشلايين و تحمل ادين چونكي دوغورداندا توركه تورك دن سونرا يانان يوخدي.
گونتاي قارداشيم !
سنين يمك اعتصابيوي اشيتدييم دن اينان ياديمدان چيخديين يوخدي. اينانكي كيچيك قيزيمي گوردويومده سنين آتايين يادا ساليب آغلاييرام . هله اشيديرم كي سني تيمار يرينه دويوللر؛ دلي اولورام . سنين جاوان خانيمين حالين هچ دوشونمك بله ايستميرم . آنان نه چكير تخميني ده مني چيلديرتير. آمما حييف اليمدن بير شي گلمير . اوز اوزومه سني يارقيليان او قاضيني گديب گورمك ايستيرم ، اونا بش چيفت لاف اتمك ايستيرم ، آمما بير باخيرام كي سن نه گوزل اونا نه اولدوغويون خاطيرلاديب سان ، هيرسيم سويويور. گورورم كي او كاس و رنگي توتقون كد ير بير آلماسدي كي دوشمان الينده سنين كيمين بيرلانتا آلماسي كسمك ايستيير!!! آمما سن مراك اتمه. سسين يرينه اولاشيب دير، بو گلن سكوتون سسي منيم قولاغيمدا چيننيير . او سكوت كي اصلاح طلبدن توتوب شاه پرسته كيمين ، قارادان ؛يشيله كيمين ، اصفهاندان تهرانا اورداندا مشهده ؛بونلارين قولاغلارين ساغير ادير بيزه بسدي .
گونتاييم
سن بيل آللاه بسدي ! اوركلريميزي بو دردي قالديراماز . سنين سسين هر يره گديب چاتدي . سندن آذربايجانيميزنامينا ايستيرم سياسي اوروجونو دوردوراسان.
سن دور بيز باشلياق !
من اوز نوبمده يارين صاباح دان اوچ گونه كيمين يمك دن ال چكجيم . ايش يريمده ، ائوده ، توكاندا ، بازاردا ، كوچه ده ، تويدا ، ياسدا ، يمك قيروومي هركسه ؛ سنين اوچون اولدوغون خاطيرلادا جاغام و بوتون فيكيرداشلاريمدان آذربايجان و دونيانين هر بير طرفينده اولورلار اولسون لار،ايستيه جيم كي منيم كيمين اتسينلر.
عزيز وطنداشلار من اوز وريمدن صاباح سحردن اوچ گونه كيمين يمك يميه جيم ، سيز نه ادجكسينيز ؟
آماندي گونتاي الدن گدير!
گلين گونتاي نامينا اوچ گون يمك دن ال چكك ، بيز باشلياق گونتاي بيراخسين !
۱ نظر:
seninle qayğıdaşıq taymaz qardaş
Elçin
ارسال یک نظر