گیریش:
دئييرلر آخير چارشنبه دوعاسي تئز قبول اولار . رحمتليك ميرزا علي مؤعجوز شبيستري سكسان -دوخسان ايل بوندان قاباق ساتاشما دیلی ایله گؤزل بير دوعا ائله ييب . گؤره سن او ایندی ديري اولسايدي نئجه دوعا ائده جك ايدي؟ سيز، هه سيز ! بو آخير چارشنبه نه دوعا ائده جكسينيز؟!
ائلچین
آخير چرشنبه دوعاسي
الهي سني آند وئريروخ صدرينون صداقتينه ، كره ياغينون كرامتينه جميع علي شيعه سين آخر چرشنبه گئجه سي حلوانين قبرينه زوار ائله . الهي سني آند وئريروخ پلووون زولف پريشانينه سن بيزيم اليميزي خوروشون دامنيندن كم و كوتاه ائلمه.
يا غفار خدايا خداوندا سنه آند وئريروخ پسته نين دهان تنگينه ، خورمانون خوش رنگينه ، بيز اهل شبيستري مبارك يئددي لووونون شفاعتيندن محروم و بي نصيب ائلمه. الهي سنه آند وئريروخ آبدوغيله قندابون پيلوو دورسينون اطرافينده چكديگي زحمته، او گئجه كي گئجه آروادا بير هوش و باش كرامت ائيله ياغ – دوگونو خراب ائديب اوقاتيمي تلخ ائتمه سين ، اوشاغي آغلييا- آغلييا قويوب قونشويا چوبوق چكماغا گئدمه سين، اي آخير چرشنبه گئجه سي ياتوب سحر تئزدن گئيينيب قوشلار زيارتينه گئدن خانوملار؛ آمين دئيون.
اي چهل ياسين سويي كيمي گندوو سويوني استعمال ائديب مرامينه نايل اولانلار اوجادان آمين دئيون. خدايا پرورديگارا سنه آند وئريروخ كوچه لريميزون زيغينه،حماملاريميزون كثافت ليفينه، جوانلاروموزون قويدوغي بيغينه، سن بو يالانچي مسلمانلارين ايمانيني كاميل ائله. اي اون تومنه يوز تومن معامله آلانلار. اي ائوين باغين گيروو قويانلار ؛ آمين دئيون.
الهي سني آند وئريروخ دولتليلريميزين توخلوغينه و فقراميزون چوخلوغينه، خيروو سويونون يوخلوغينه، يا بيزي اؤلدور طلبكارلارين يخه سين قورتار ، يا طلبكاري اؤلدور بيزيم يخه ميز خلاص اولسون. اي آرپا چؤرگيني بيربيرينون اليندن قاپانلار ، اي سويوق يارما آشينه حسرت قالانلار ؛ آمين دئيون.
الهي سنه آند وئريروخ تومني اون شاهينه حجت يازان موللالارون قلم دواتينه ، استامبولچيلرين براتينه، تيفليسچيلرين مناتينه ، بو نذر صاحيبنون امواتينه آخرتده نئينييوم گوني گؤرستمه .اي بير كاغاذ لئره وئريب بير جوت جوراب آلوب آياغينه سوخانلار، ياتموسوز يا بنگ آتموسوز، اوجادان آمين دئيون.
اي نذر صاحبي آللاه گؤروم سنون پوللارين فالچييه ، ايلانچييه قيسمت ائله مه سون. اي باجيلر آللاه فالچيلري سيزه و سيزي فالچيلره چوخ گؤرمه سين! اوجادان آمين دئيون. جناب حاجي آللاه نذيرووي قبول ائله سين. سنون كي الوندن سو سووارماخ و جنازه يه ياپوشماق و خير و شرده ايشله ماق گلمز،پس آللاه سنون يانيدا ياتان كاسبون عؤمرونه بركت عطا ائله سين. سنه ده بير اؤلوم وئرسين تا بئش اون كاسيب فوتوندان خئيير گؤرسون. اي دؤولتليلرون خئيراتيندا آشاغا باشدا اگله شيب دويون قارين پيلوو يئينلر اوجادان آمين دئيون. اي موللا قورخوسوندان سققل قويوب و باش قيخديرنلر ؛ آمين دئيون.اي اوستاد استامبولچي قردش نه ياپدون گلدين وطنه اولدون اتنه. اگر ننه ن جاري دي ، سنين عؤمرون ياري دي! اي جميع علي شيعه سين موردار و اؤزين پاك بيلن جاري، اؤلدورسون سني تاري ؛ آمين دئيون .
خدايا خداوندا بار پرورديگارا بير سؤز دئيه جاغام آجيغين گلمه سين اولو كي ياديندان چيخا، سن بو نذر صاحيبونون قديم اؤلنلرينه و جديد اؤلنلرينه رحمت ائله . علي الخصوص ايكي يوز دوخسان دوققوز ايل بوندان قاباخ آخشاما اوچ ساعات قالاندا قايناناسي توكذبان خالا كي باش تيره خاكه چكيب ، اونا رحمت ائله و اوندان ياخچي متوجه اول ، جان سنون ، جان توكذبان خالانون. آمين دئيون لال اؤلميه سن. الهي سنه آند وئريروخ بو نذر صاحبيون بوردوغو گؤله لره و چيخارتدوغي گؤله لره اولا بوتون باغ صاحبلرين بونون شريندن محافظت ائله و ثانيا حلال كسبينه بركت عطا ائله . اي باغينه هفته ده قاپي آلانلار ، اي آلتي آي زحمت چكيب حاصيلده الي بند اولمويانلار ؛ آمين دئيون. آمين يئددي پيئغمبرين آدي دير. اوجادان آمين دئيون.
الهي سنه آند وئريروخ گيرده كانون گيرده لوغينه ، فينديقون خيرده لوغينه ، سيسيگونون قبيرستانلوغينه، زيبيل تؤكنلرين باشين قويوب آياغينه يامان داش وورمه. اي اييده ني يئييب چرده گين حصير آلتينه سوخانلار، اي بورنين اتگي ايله سيلنلر، اي پيرپيسلي كيمي دونبالانلار، مبادا آللاهون بيتينده سيزدن بير حاديثه بروزه گله ، هر ايكي دونياده روسياه اولاسوز؛ قالخون اوجادان آمين دئيون. به به طاغدان دا بير نذير وئرديلر،اي باجي بيلميرم موسلمانسان يوخسا كافيرسن ، بوينووا قيزيل تاخيرسن، نامحرملره باخيرسن،الهي آند وئريروخ اوجي بينيغونون (خيتنه چي) قددينه و تضالينون مددينه بو آورادون جددينه جنات عدنده يئر كرامت ائله ؛ اوجادان آمين دئيون.آمين دئينلرينن برابر.
الهي سنه آند وئريروخ ربانون مباحلوغينه ، قوماربازلارون ساغلوغينه، فيرعونون آللاه لوغينه ،كربلاي حسينقولونون جراحلوغينه ، بو نذير صاحيبيني عصرون عزرائيل حكيملرينه و اداره لرينه موحتاج ائله مه. اي اوجادان آمين دئين سني گؤروم وايقانلي نين زولفعلي نين سوتينه راست گله سن.به به اوستا عباسعلي ده بير نذير گؤندردي ، اوشاخ اوجادان آمين دئنن. خدايا بار پرورديگارا سني آند وئريروخ مشهدي لوطفعلي نين ايشتهاسينون آزلوغينه ، هئرو جعفرين كئفينين سازلوغينه و كربلاي حسن علينون گؤزلوغينه ، آغ ميزا محمدعلي آغانين سخنورلوغينه بيره يوزمين بو دونيا بير ه يوز مين آخيرتده اجر و عوض كرامت ائله. اي باشين اوستا عباسعلي يه قيخديريب پول وئرمه ينلر ؛ اوجادان آمين دئيون.الهي سنه آند وئريروخ گولشنين ديوارلارينه و ايمامزادهنين داغيلان توفاقينه، سن بو نذير صاحيبيني سولطان بابانين فبرينه زووار ائله .اي بو نذير صاحبي گئت بو دره كوچه سينده كي پير مطلبون وئرسين، حسين بابا كمرون باغلاسون، قيشون توته توت وقتينده مسجيدون منارسينده اذان دئيه سن. اين ايمامزاده قاپيسينه قنديل باغلييان باجيلار؛ اوجادان آمين دئيون. الهي سنه آند وئريروخ موللا محمدعلي (موللامئده لي) آخوندون قبرينه، پادشاه اسلامون تيغ بي دريغيني اعدايه قاطع و بوررا ائله. اوجادان آمين دئيون. الهي بو عمي كي آدين تانيميرام منه پول ايلتيفات ائله دي. اي عمو آللاه قاداني بلاني ، عقرب ايلاني ، ماميللي ماتاني ، يانوندا ياتاني ، رحمتلوق آتاني ، يئرون گؤيون بليياتيندان محفوظ ائله سين.
هیچ نظری موجود نیست:
ارسال یک نظر