بو يازيي خورداد شهيدلري ودوستاقلارينا ايتحاف ائديرم
ائوديم، نئچه گون دور مختليف شهرلردن چشيدلي خبرلر گلير. گويا ايران قزتسينده بير ادبسيز ليک ايران توركلري عليهينه اولوبدور. يونيورسيته طلبه لري هيجانلي نيماييشلر کئچيريللر. بير نئچه ايل اوولي ذهنيمدن کئچيريرم، "لاريجاني" بير تحريك ائديجي فورم يايين لاتميش نتيجه ده اويرنجيلر هيجانا گليپ اعتراضلارا باشلاميشديلار،حتي اورموشهرينده يونيورسيته ائشيينه ده يورويوشه چيخميشديلار. آمما عاددي اهالي او قدر دستك وئرمميش و اولايلار ياتيشيلميشدي. اوز اوزومه فيكيرلشيرم بودا گلر! بودا کئچر؟!
افكاري داغيتماق اوچون تلویزيونون اوزاقدان كومانداسينين توشونا باسيب آچيرام، همیشه كي كيمين ماراخلي بير شي يوخدور.ئويدويي(ماهواره ني)چاليشديريرام،گون آذ تي وي اوستونده تنظيم اولوبدور."احمد اوبالي" بير شيلر ي بويوك حرارتله آننادير.سانكي قولاخ لاريم قورشون لا دولوپ. بير شي دويمورام!،ياواش ياواش ئوزومه گليرم. انسانلار تبريزده خياوانلاردا توپلانيپ لار.راستا كوچه جوشور،بانك ميللي ،ساعات قاباغي،قوت ميداني،آبرسان و دانشگاه فلكه سي گرگين لحظه لر گچيريرلر...
اينانميرام! ،درحال تلفونا ال آتيب بير نچه دوستي آرييب سالام لاشمادان ؛هيجانلي خبر لر آليرام.يريمدن فيرلاييب ئوست قاتداكي قونشومو چاغريرام :"حميد آغا . حميد آغا .اشاغي گلرميسن!"اودا گليپ بير ليكده هيجانلا خبر لري ايزلييريك،بو دفعه غاليبا عاددي اينسانلار گمينين گوورتسينده!بو دفعه كاپتان باراتعلي،مشه موحسين،فاطما خالا،نرگيس دي.حميده دييرم:"اله بير بو قره؛ او قره لره بنزميه جك."
احمد اوبالي سيخ سيخ صاباحين اعلانين آنونوس ادير:"اورمو عطايي خياواني".:"اورمو عطايي خياواني"...قولاغيم توي توتوپ .بيزده صاباحين قرارين قويوب چاييميزي يودوملوروق.
گجه ني چوخ آز ياتيرام ، ساييل باييلدايام :يا گلمسلر!،يا محجوب اولساق!
سحر چاغي ايشه گتمدن تيلويزيوني آچيرام توركجه بير ماهني چالير .تعجب ائديرم .سونرا آپاريجي آذريلرين باشين شير باشينا بنزه دير.گولمه مك مومكون دييل .اوجادان دييرم:گوردون بو قره او قره لره بنزمز!
ايش يريمد كي دوسلاريمنان دورمادان بوگونلرين، اولايلارين دانيشيريك،بيرايكي دنه ساتقين وار !!!دورمادان بورا ريضائيه دي، بوردا بير شي اولماز! دييب اورييمي بوشالديرلار.
ساعات اوچدي ،ماشيني حيطه بيراخيب قونشومي چاغريرام.بير ليكده اتوبوسا مينيپ عطايي ايستيقامتينه حركت اديريك".مدرسه ده نه واريدي؟".بوني من سوروشورام."هركس حاضيرليقدا،وعده ميز ايران قازتي ئونونده .بو گون درسيميز بونلاريدي".بونلاري حميد آغا جوابيمدا سويلييب گولومسويور.
ساها ت دورده ياخينلاشير.وبيز "عسگر آبادي" چارراهينا ياخينلاشماقداييك ،خياوان غير عادي سويه ده تيخيليب.مقصده چاتمادان اتوبوسدان انيريك .
يوريه رك با زار آزينا گليريك ،سانكي بايرام عرفه سي ،آخير چارشمبه دي.قالديريم لار اينسانلاردان داشماخداديرلار.اوساتقين لاري ياديما گتيريب.دوداقلاريم آراسيندا سويلييرم: "بوراسي اورمودور، تورانين 6000ايليك پايتختي ".
كورپونون اوستونه چاتميشيق، مامورلار هر طرفده اينسانلارين توپلانماسينا مانع اولورلار. "آغا.!قارداش!،دورما! سن نه نم! حركت اله!"،بوني اونيفورمالي بير پوليس آرخامنان اوجادان ديير.
"سردار مچيدينين" قاباغينا گلميشيك.(بورانين همن ئوز به ئوزونده تي بي تي يازي خاناسينين يانيندا مرحوم معتمدالدوله نين مطبعه سي ير آليپ )سانكي او مرحوم وقايع ارومي در جنگ عالم سوز كيتابين اله آليپ بيز لري ماراخلا سير ائدير.ايلك قووالاماجا باشلير.اولار قووالير بيز قاچيريق.چوخ گچمير.اوقدير قالاباليق اولوروقكي مامورلار بير طرفده شاشقين ييغيليب قاليرلار."هركس كي بي طرفدي،سنن ده بي شرفدي". "هوووي"."ساتقين !" ساتقين !" ساتقين !"بونلاري جمعييت مامورلارين گوزونه سويليير.قارشي طرف جان هاييندا!"بورا ريضايه دي بوردا بير شي اولماز" دييب،اوننملرين آلماميش لاردي!
ايران قازتسي آلوو لانيپ يانماقدادير."هاراي هاراي من توركم"."تورك ديلينده مدرسه"بوز قورد ايشارتلري.جمعيت مدرسه اسلامي(سازمان تبليغات اسلامي)وپاساژ انزلي نين ئونونن گچير،بله باخيرام چيغليك(جيغ)سسلري هله كسيليمييب!آخي بورا ارمني و جيلو سويقريملارينين جمعي مزارليغيدي.كورپه لري؛قادين وتيكه تيكه اولموش آداملاري يادا ساليب آغلييرام.
"صولت" خسته خاناسي و"شفا" خسته خاناسينين بالقونوندان نوغول وگول جمعيتين باشينا ياغماغدادير.يتيشميشيك" ايالته" گويا اوستاندار دانيشماغا حاضير اولور.قديم شهرباني اونونده دورورام،حميدآغاني اوزاخدان سچيپ طرفينه گديرم.آخي بير بيريميزي قاچا قاشدا ايتير ميشديك.مندن نيگران اولدوغون سويلييب، ئوزومنن اوپور." نفسين نجه دي؟"."ياخچيام ."بوني من جاوابلييرام.آخي 19آي جبهه دن سونرا باهار لار منده نفس توتولما عاريضه سي ياديگار قاليپ.
هووي!!!بي شرف !بي شرف!!!بوني ميللت ديير.بلديه بيناسينين بالقونوندان:"مردم مسلمان آذربايجان اوز پشتيبان ليقلارين از ره..." بونودا آقا ي اوستاندار ،دمه يه موفق اولمور!.داليجا "تورك ديلينده مدرسه"بونودا گينه ميللت هايقيرير.ياديما دوشور بير زامانلار بوردا ميللت" آزادوطنين" او حرارتلي چيخيشلارين آلقيشلاميشلاردي.
اوردان جمعييت، شهر چايي خياوانين اشاغيسينا يونله نير.وتيلويزيون طرفينه يول آلير. آرتيق گون باتماقدادير و منيم تخمينيمه گوره 400مين اهالي مركزدن ايالته،سيروس خياوانيننان پنج راها وهابله شهر چاييننان تيلويزيونا كيمين خياوانلاري دولدوروبلار.تمدن دربندينين آغزينا يتيشميشيك،بوردا زامانيندا مرحوم مه حه مد ته مدن(محمد تمدن) و رحمت الله توفيق (اورمولو تاريخچيلر)ياشاميشلار.سانكي دربندين(كوچه نين)آغزيندا خالقي سلاملييرلار."بيز ئولميه راضييق،بابكين سربازييق" بو هايدان غرورلانيرام.
آرتيق" قيصر خانيم باغينا" يتيشميشيك.(بو باغ ايندي مرحوم مجيدي افشارين وراثينا عاييدديرو مركز بهداشت شماره 1ئه ياپيشيب).يرده سانكي گوزومه سميتقونين قزت پارچالاري ديير:"روژ كورد،شوو عجم".(روز كرد،شب عجم)ئوزومه نهيب ورورام اگر او گونكي اينسانلار بو گون كيمي دويارلي اولسايديلار اونجا شيكنجه يه بو باغدا معروض قالمازديلار.
تلوزيون بيناسي ميللت پاركينين جيواريندادير، گنج لر ال اله وريب او بويدا معجرلري سانكي چوپميش يردن چيخارديب آرخاسي اوسته بيراخيللار."ائل گوجي سل گوجي."دييب گچيرم. .
تيلويزيون بيناسينين آليشماسين گورورم.مامورلار اينانيلماز حيزلا تويوتا وموتورلاري جمعييتين اوستونه سوروللر،اوجا بويلي فارسيجا دانيشان بير مين باشي(سرگرد)هاوايا آتش آچير،آز بير عيدده ايچه ريده محصور قاليب، بير آدامي هچ اولماسا 5-6مامور اوزون آغاجلارنان دويورلر..بيرآز سونرا ميللت دايانامييب هوجوما گچير،مامورلار گلمه لري كيمين قا چيرلار!!!
"....آي انار انار بيا به بالينم،شبنم گل ...."
بايات(اسكي) بير فارس ماهنيسينين سسي گليرومن خاطيرلاييرام كي1385 ايلينده دييلميشيق!،تقويمه باخيرام 1388 نيسان آيينين سون گونلرين گوسترير. ياديما گلير،يان قونشودا تولد توتوبلار.گينه" بورا ريضائيه دي، بوردا بير شي اولماز!زمزمه سي گلماقدادير.گركه ن جاوابي ورمه يه حاضير اولورام.
قاپلارين چاليب منده اورايا گديرم،آمما بير توي كاستي ايله وآذربايجان رقصينه باشليرام.دوداخلاريم آراسيندا سويلنيرم: "بوراسي اورمودور، تورانين 6000ايليك پايتختي.
هیچ نظری موجود نیست:
ارسال یک نظر