ياش ، ياشام ، اينسان و بيتمين حسرت لر

قيرخ ايل ، اللي ايل ، آلتميش ايل ،  بوندان آز و يا چوخ . او قدرده موهوم دييل! آنجاق اينسان بللي بير زاماندان سونرا- كي آدام دان آداما  فرقليدير- بو معنايا يتيشير كي ياشام چوخ قيستادير. بويله چونوب آرخانا باخديقيندا ، هچ بير شي ياديان گلمير. سانكي دونن ايدي  ،بويوك قارداشيم اليمدن توتوب مدرسيه گوتوردو و من بيرينجي صينيفي باشلاديم . بير زامان گوزومو آچديم و گوردوم اينقيلاب اولوب . سوندان ساواش ايللري . چورك و بنزين قيتليغي . سونرا ديپلم آلديم . يونيورسيته و تبريزده گچيجي اولاراق ياشاماق. سونرا عسگرليك . ينيدن اورميه . دولت مامورلوقو . سونوندا اوزل سكتوردا ايشلمك . ائولنمك . ايشدن چيخماق . آيلوي سورونلار. ينيدن تبريزه گتمك . آتا اولماق ، اورمويا دونمك . ينيدن آيلوي سورونلارين فيتيللنمه سي . تك باشينا اوشاق بويوتمك . ايقتيصادي سورونلار ، دولانديريجيلارين توزاقلاري  و  جان يولداشلارين يارديملاري . ايشله مك ، بهره گوتورمه مك! حاكيم قارشيسينا چيخماق ، حق ديوانيندا ناحق گورمك!دوشوب ازيلمك ، ديرچلمك ، دورماق . بو دا ل دان او دالا قاشماق . اويرنمك ، اوزو  اوزونه گنيشديريلمك. تام نا اوميدليك پنجه سينده اسير اولاركن بير قاپينين آچيلماسي و ...

اله ياشاماق بويله بير شيءدير.

 ياشاماق سانكي بير ياريشدير. دوستلا ياريشماق ، دوشمانلاريلا  ياريشماق و حتي اوز ون اوزونله ياريشماق. بو نو بيلك كي اولئنه قدر اينسانا راحات حرام دير ( ان الانسان لفي خسر). آمما بونا اينان مالييق كي پيس گونون آرديندان ياخچي گونلرده گله جكدير. البت كي گله جكدير! ، چونكي گلمز سه ، ياشام آنلامين ايتيرر.

 بلكه دونيانين اوبور يرلرينده ده ياشاماق اشاغي يوخاري بويله بير كيفيت دير. البته بونوبيليرم كي قانون ، دوشونجه ، ساغ دويو و خوش گورو حاكيم اولان اولكه لرده ياشاماق داها دا راحات و بيزدن ده قاريشيق ، كيفي و آني داورانان اولكه و ايجتماع لاردا ياشاماق بيزيم ياشامميزدان دا آغير و ناراحاتدير .  آمما ياشامين كيفيتي اله دونيانين هر بير يرينده بويله دير. ياشاماق چتيندير ، هله دوغرو ،  دوروست  ياشاماق هر يرده چتيندير. آمما باشيوي ديم ديك توتوب شرفله ياشاماق دونيانين ان گوزل نعمه تيدير. صاباح گونون بير گونونده اينسان اولوم دوشه گينده ياتاندا  بلكه اينسان بله بير شيلري دوشونه بيلميه جك ، آمما امينم كي يالان ، دولان ، شرفسيزليك ، آدام ساتماق و اوزگه لرينين ماليلا ياشام سورمه مك هر كسي تبسم له ،دونياسينين دييشديرمه سينه سبب اولا بيلر .  تكجه بير شيء اينساني  اينجيده بيلر و او  بودور كي اينسان لياقت و استعدادلاريجا دونيا نعمتلريندن ايستيفاده اده بيلمه ميش  ، و اطرافينداكي  اينسانلار طرفيندن فرق اديلمه ميش اولورسا ، او حسرت له دونيادان كوچوب گتمك ان ناراحات اديجي حيسدير. بو مني هر شيدن چوخ  هم قورخودور و هم اوفكه لنديلير. تاسف كي بونا چاره يوخدور . آخي دونيادا ياشام سورمك اله بويله بير شيدير . ياشاماق ، ياريشماق و حسرت چكمك .