آختارما ، بيزيم اولكه ده ميخانه تاپيلماز!
بيرليك مئي ني ايچمگه پيمانه تاپيلماز!
بو اولكه ده عاشيق اولاني داره چكرلر!
شمعين اودونا يانماغا پروانه تاپيلماز!
بو گونلر قيرميزي رنگ يا قيرميزي سيمگه و بعضي لرين دييميله قيرميزي بايراق ميلي فعاللارين و بير چوخ تشكيلاتين توجه مركزينه چويريلميش دير. قيرميزي رنگي اونه رنلر(پيشنهادورنلر) اوز دليل لرين چشيتلي اورگانلار طرفيندن و بير چوخ بيان نامه لر ايله ايضاح اتميشلر. بو سيمگه ايله موخاليف عزيزلريميزده اوز نظرلرين مجازي دونيادا و چشيتلي يوللارلا مطرح اتميشلر. بعضي عزيزلريميز بو رنگين سونولماسي و دمكراتيك يوللاردان اولوب اولماديقينا اينتيقاد لاري اولا بيلر، بعضي لريده تكجه بو اوزدن موخاليفت ائده بيلرلركي نيه اونلارين نظري اونجه دن سورولمويوب ؟! بعضي لريده تكجه بو اوزدن موخاليفت ائده بيلرلر كي بو موخاليفت سس گتيرسين و اونلاري حركتين اذهانيندا برجسته اتسين! حتي بعضي لري بو رنگله مووافيقت گوستره بيلرلر تا پالاسا بورونوب الينن سورونسونلر! هر ايكي طرفينده حاقلي و حاقسيز گركچه لري اولا بيلر. هر ايكي طرفينده سوزلرينده حقيقت دن نيشانه لر حتمن كي موجود دور .
آمما منيم بونلاريلا ايشيم يوخدور . من بير ديگر جهتدن بو اولايا باخماق ايسته ييرم .من شخصن بير وطنداش اولاراق بو رنگي بيه نيرم. منجه قيرميزي بيزيم رنگيميزدي. قيرميزي بيزلري بيرلشديره بيلر، چونكي قيرميزي هيجان ، اود، ساغلامليق و تحرك رنگيدير. قيرميزي عشقين سمبولودور. قيرميزي بابكين و ستارخانين بايراقينين ، اله جه ده قيزيلباش لارين رنگيدير. قيرميزي آيريجا ايسلام پيغمبرينين سووديي رنگدير.قيرميزي قيزيل اوزن چايينين رنگيدير. زنگانيميز قيزيل آزه ربايجان ديه مشهوردور.قيزيل بيزيم قديم شاهلاريميزين و سردارلاريميزين لقبي اولموشدور(قيزيل ارسلان).قيزيل سوزجوكي قيرميزدان بير نشانه دير،قيزيل بيزيم معدن لريميزين زنگينليگيدير.
قيرميزي رنگ ، قودرتلي ، ايستيقامتلي و غيرتلي اينسانلارين رنگيدير. ايچ گودوسل (غريزي) جهتدن ده باخساق قيرميزي بيزيم خالقيميزين يادداشيندا حك اولونموش بير رنگ دير.چونكي بيزيم اوشاقلاريميزين ياناقلاري آزه ربايجانين سازاقيندا قيرميزي اولار. بيزيم توپراقلاريميزدا قيرميزي توت ، قيرميزي اوزوملرودونيانين ان قيرميزي نارلاري عمله گله ر.
قيرميزي آيريجا فداكارليقين دا رنگيدير. بو اوزدن بيزيم قيرميزي رنگه احتياجيميز وار. من قيرميزي يا دستك وريرم. من قيرميزيني بيه نيرم . قيرميزي منيم رنگيم دير. قيرميزي منيم خالقيمين رنگيدير. قيرميزي كيمليك آراييشيندا اولانلارين رنگيدير . گلين هر بيريميز قيرميزيا دستك وره ك. قيرميزي حركتيميزين سمبولودور. قيرميزيا دستك ورك تا قيرميزي دسته ييميز اولسون.گلين قيرميزيني ميخانه ميزين پيمانه سي اديب ، عاشيق اولانلارين داره چكيلمه سين اونون كسه ك.
اورمولو تايماز-1389سون باهار
هیچ نظری موجود نیست:
ارسال یک نظر