اورمودا نه گچير؟

آزه ربايجان موستقيل خبري سايتلاري و خبر آژانسلاري گچن گون ايناليلماز بير خبر ياييملاديلار. اورمودا جوما گوني مهر آيينين16نجي گوني ، گون اورتادان سونرا ساعات اوچ ياريمدا شيدتلي توقوشمالارا صحنه اولدو. بو توقوشمادا دوققوز نفر خسته خاناليق اولوب و اورمونون ان موهوم خياوانلاريندان بيري نچه ساعات ترافيكه قاپالي توتولدو. بله جه شهرين موهوم بير حيصه سي دوندورولموش وضعيته گلدي. ميللي تحقيره دايانانميان گنج لر بو كز شيدتلي راكسيون گوستريب و ميللي غيرت لرين نوماييشه قويدولار. آمما اصلي و موهوم سوال بودوركي اورمو اهاليسي كي خوش گورو و مهربانچيليق و قوناق پرورليگه مشهوردولار، ندن بو كز بو قه در سرت چيخيش اديب و دمير يومراقلارين گوسترديلر؟ دوغوردان اورمودا نه گچير؟ بو سواللارا جواب ورمك اوچون گرك اورمونون گچن يوز ايليك تاريخين و سون اوتوز ايلين اولايلارين گوزدن گچيرك . اورمو شهري تورك دونياسينين و خصوصن گوني آزه ربايجانين ان كريتيك (بحراني) و ان حساس ژئو پولوتيك نوقطه سيدير. منجه گله جك ده اورمو، دونيا تورك لرينين و گوني آزه ربايجانين ان بليرلي نوقتاسينا چويريله جك دير . بو اوزدن من دييرم اورمو آزه ربايجانين قلبيدير. اورمو شهري آزه ربايجان ايكي شيمال و جنوبا بولونمه ميشدان قاباق تورك – آزري افشار دولتينين مركزيدير. بو دولت مه حه مد قولو خان افشارين سركرده ليگيله سينان دژ(سنندج ) دن تا دربنده كيمين حوكوم سوروردي. نادير شاه افشار مخصوص اهميت بو شهره قاييليدي. كريم خان زند نچه آيلار بو شهري چنبره آليب و مينلرجه اورمولونون قاتيلي بو شهرده شاهليق تختينه اوتوروب و تا بو شهري آلماميشدي اوزون شاه ايعلان اتمه دي. اورمو شهري غربي آزه ربايجانين مركزي و شرق ، قافقاز و غرب توركلري يعني توركيه و آوروپا توركلرينين بولوشوان نوقتاسي و يا ديگر آديلا تورك دونياسينين باشين بدنينه وصل ائدن تكجه توپراق دير. اورمو شهري وريملي توپراقلارا و بول سويا صاحيب اولدوقونا گوره ان قيمتلي اكينچيليك و حيوان پرورليك پوتانسيل (ظرفيت )لره و معدني بير چوخ زنگينليگ لره صاحيب دير. بو بولگه تيجاري جهت دن ده چوخ اونم داشيير.

بيرينجي دونيا ساواشيندان قاباق بويوك دولت لر بو اهميتي درك ائدرك ييرمي ميسيونرليك هيئت له بو شهرده حضور تاپديلار. اسپانيوللار، آلمانلار ، اينگليس لر، فيرانسيزلار، آمريكاليلار،روسلار و ... بو جومله دنيديلر. بيرينجي دونياساواشي چيخديقذان سونرا ارمني لردن ايستيفاده ائدرك عثمانلي دولتينين آرخاسيندا و ان ضعيف قيسمتينده تخريباتا باشلاديلار. آسوريلار(وان جيلولاري) و ارمني لر يوزمينلرجه تورك آزه ربايجانليني اولدوروب و وار يوخدان چيخاتديلار. آمما اهالينين موقاويمتي و تورك اوردوسونون مداخيله سيله اوز هدفلرينه يتيشمديلر. بو كز سوريه ، توركيه و عيراق كوردلريندن اولاشان بير اوردودويلا كي قاتيل سيميتقو نون باشچيليق لا تسليح اولونموشدو اللريندن گلني اسيرگه مه ديلر آمما گينه ده موفق اولماديلار اورمو و غربي آزه ربايجاني تورك دونياسيندان آييرسينلار. بو كز ريضا شاه دورونده كورد كوچين حيضلانديريب و ديگر طرفدن توركلوك و دولتچيليك نيشانه لرين قالديرماقا چاليشديلار. شهرين قبير صانديقلاري شهيدلرين مزاري اولاراق و ميلتين بيرلشمه نوقتاسي اولاراق آباداني و ايمار آديلا مدرسه ، پارك و خسته خانالارا چويريلدي. اورمو اركي يعني اورمونون دولتچيليك سيمگه سي تمامن تخريب اولدي. شهرين قديم بينالاري گتديكجه خارابا قاليب و ييخيلدي. تكجه ايلخاني دوره سينين ياديگاري اورمو ميلي ( سه هونبد) اياخدا قالدي. افشار آدي بوتون كندلر و سيكونت گاهلاردان سيليندي.ايسلامي اينقيلابدان سونرا نا امنليق و چشيتلي ساواشلار اوزوندن چوخلي تعداد كورد لر كندلردن شهره زوروملي اولاراق كوچ ائديلديلر. ساواش دان سونرا فارس دولتينين يارديميلا بو كوردلر هربير شي كي قيمتليده و ايراندا تاپيلميردي حدودلاردان قاچاق اتديلر . بو سايه ده اينانيلماز گوج و ثيروته صاحيب اولدولار. خاتمي دورونده بيلينجلي و سيستماتيك اولاراق تحصيللي كوردلر چشيتلي دولت داييره لرينه اوبور ولايت لردن گتيريلديلر و بو كز تحصيل آلميش و سوادلي كوردلر شهره كوچ اديلديلر. داها سيز شهرين هر يرينده بانك ميلي دن توتون ثبت اسنادا ، اوردان يونيورسيته لره قدر كورد صاحيب منصب لر گوره بيلردينيز. بونلارين ان يوكسك مرتبه ليسي آقاي محمد زاده معاون عمراني استانداري اولدي. بو پروسه ده اورمونون يرلي تورك اهاليسي هر گون داها كاسيب ، ايش سيز و چاره سيز قالديلار و كوردلر هر گون داها پوللي و گوجلي دوروما گلديلر. ياواش ياواش كوردلر شهرين ان گوزل منطقه لري و باهالي يرلرينده ائو آلديلار و زرگرخانا و بزاز خانا و بازار ايچينده توكاندار اولدولار. باهالي باغ ، باغچالاريدا آلمايا باشلاديلار. اورمو اهاليسي و غربي آزه ربايجانين تورك اهاليسي بونلاري گوروب و ياخين تجربه لرين او جومله دن هر گون جاوانلارينين شهادتين گورن و يوللاردان سويولماقلارين گورن و همچنين سولدوزون قانلي وقايعين(1385نجي ايلين اولايلاري) گورن اهالي گتديكجه قوشقولانيب و آييلماقا باشلاديلار. ديگر عيبارتله اورمو تورك آزه ربايجانليلارين جبهه سي قونومونا گلدي. ايندي هر بير مجليس ، هر قوناقليق هر توي و ياس تورنينده ميللي ماراقلار، كورد تهديدي و فارس فاشيسمي دانيشيلير. بو گون هر بير اورمولو ، سولدوزلو ، سالماسلي ، خويلو ، قوشاچايليلي تهديدي اوز گوزيله گورمكده دير . آزه ربايجانين اوبور بولگه لريله موقايسه ده مثلا هر بير شرقي آزه ربايجانليدان آرتيق وطنينين ، ناموسون و مال و جانين خطرده گورور و گچن يوز ايلين و سون اوتوز ايلده درس آليب . داها اورمولو سوي قيريملاري گورمك ايسته مير او اوزدن هر بير ميللي اعتيراضدا ، تيراختور اويونلاريندا ، اورمونون دورد جانيبه فوتبال موسابيقه لرينده ، دونيا واليبال كوپاسيندا و هر بير يرده و هر بير شيده بير نوقطه تاپسا اوز وارليقين گوسترمك ايستير. بو اوزدن سون توقوشما و بو قانلي اولايلار تكجه و تكجه اورمولولارين اويانيق اولدوقلاري ، گچميشدن درس آلمالاري و ميللي اويانيشين نيشانه سيدير. بو گون اورمولو چوخ چوخ آييق و فعالدير. اورمولو آزه بايجانين قلبي اولماقا چاليشير. اورمو گتديكجه آييلير، اورمو گتديكجه حركتيميزين اون صفحه لرينه گچير. اورمو قاراباغ اولماق ايسته مير. اورمو آزه ربايجانيميزين ان حساس نوقته سيدير. اورمو يا هر بير آزه ربايجانلي دستك ورمه ليدير. اورمولو بو گون فارس فاشيسميني بو وقايعين اصلي سوروملوسو بيليب و بو اوزدن بو فارس فاشيست جوجه لري بو قدر سرت جزالانديلير. اورمو داها اياق آلتيندا قالمياجاق. ياشاسين اورمو . ياشاسين آزه ربايجان. اورمو تورك دور و تورك قالاجاق.

اورمولو تايماز. 1389سون باهار